北海道跨年之旅 Day 1 31/12/2017
今次去北海道，豬仔坐國泰，我坐香港航空，兩班機都無delay,凖時09:15起飛，14:05就到北海道。香港航空的早餐，煙肉蛋仲有薯餅，算係好食。
係等入境既時侯已經撞到豬仔，可以一齊排隊等入境。雖然兩班機一齊land好多人排隊，但都好快，大約15分鐘就入到境。
我地坐15:45既JR出去札幌站,約35分鐘，1070yen。呢架車超多人，一開始無位坐，坐到一半有人落車先有位。
我地book左4晚住JR inn札幌，Jalan.net book, total 30200yen , 約$530一晚。位置超方便，係札幌站西口行3分鐘左右就到，而且沿路有天橋和商場，落雨或落雪都不怕。房間15sq m, 可能床比較大所以看上去有點擠，但起碼比東橫INN大的。房間設計簡潔時尚，住得幾舒服。
有wifi,有免費早餐。但早餐只有麵包和沙拉，要吃飯和肉的豬仔就有點不滿了。
有牛奶布丁同yogurt! 我每日都食兩個牛奶布丁～
非常推薦這間酒店,因為真的好近車站好方便，shopping完隨時可回酒店放低d野！唯一有個缺點就係酒店唔可以寄存超過一日嘅行李，搞到我哋要用多2800yen係JR站既locker寄存行李。
之後就開始出去行街啦，因為係12月31號嘅關係，JR站附近嘅商場係18:00就關門的！所以我地用一個鐘頭嘅時間去行街。首先去咗uniqlo睇羽絨，不過冇平，所以冇買到。之後就去咗睇定聽日搶福袋嘅舖頭係邊度，因為呢度啲商場都幾大，要搵定路唔係聽日就浪費時間搵路搶唔切福袋架啦！記住今日千祈唔好買嘢住，係所有舖頭都係聽日先開始特價架！
行到商場關門，我哋就搭地鐵去大通公園站（200yen）。12 月31號其實有好多餐廳都唔開，所以記得上網搵定有邊間餐廳係會開門嘅，唔係就無野食架啦！
我哋揀咗溫野菜，依間鋪頭係香港都有分店。上年我哋聖誕節就喺香港分店食晚餐，價錢都唔算平。日本嘅分店係食火鍋放題既，120分鐘，有幾個價錢可以選擇，我地揀左2980yen果個放題，再加300yen飲品放題。
呢個course有兩種豬肉，一種雞肉同三種牛肉，另外有很多火鍋配料可以任叫。要揀兩種湯底，我地揀左辣味同壽喜燒味。
一開始會所有肉全部上一次，之後再自己叫。我地好細食，每種肉都只係食左兩碟。其實日本火鍋一定無港式火鍋咁濃味，所以我覺得味道普通。最後一人可以揀一份甜品，都幾好食。
。。。。。。。。。。。。
しゃぶしゃぶ温野菜 大通店
17:00～0:00
。。。。。。。。。。。。
食飽就去大通公園行下，睇下個札幌電視塔。
影左陣相就去激安之殿堂行下，由於所有商店都唔開，得激安之殿堂有開，所以呢度爆多人！
行左一層已經頂唔順要走了。之後我地慢慢散步返酒店，大約行半小時左右。
返到酒店馬上開電視睇紅白，點之我地竟然剛剛miss左星野源！！！而且我想聽既歌手都已經表演完⋯⋯失望呀！
最後我們就是平淡地看著電視倒數，迎接在日本過的2017年。
