土耳其童話夢幻之旅 Day 9

土耳其童話夢幻之旅 Day 9 20/10/2023



棉花堡係我地糾結咗好耐去唔去好嘅景點，因為來回車程6小時，門票又瘋狂加價到700tl （$196），最重要係去過嘅人都話網上照片都是騙人的，現場並無咁多水，大部分池都已經旱了。

最後都係覺得既然來了土耳其，點都到此一遊下，已經有心理準備去到會失望。

我係一開門就入去的，網上說南門開06:30，但冬天日出比較遲，是開07:00的。

儘管是第一組人入去，都依然係有唔少遊客的，大概2-30個左右。不過唔算多人，所以都可以影到冇人嘅照片。而且剛剛天亮的顏色是非常漂亮。

棉花堡泊車價錢20tl

一入到去嘅景色簡直震撼眼球，驚呼：嘩！好靚呀！

超級多水，每個池都有水。天空有大量熱氣球！如此夢幻嘅景色完全係天堂一般！

之前睇過有人話池水係人工放水的，但放水嘅時間沒有公開，可能我哋就係咁好彩撞正放水嘅日子。

唔好睇我着咁少衫，以為唔凍。其實係凍到黐線，鏡頭背後係要着羽絨嘅。

日出之後先暖翻少少

之後就行埋Hierapolis ancient theater，入場費已經包埋。

行上去都有啲攰, 不過的確幾壯觀。
















去完棉花堡，我哋直接揸車返去Antalya, 返到去見仲有時間，所以就揸咗去附近嘅商場行陣街食吓野先。係food court叫咗個雞肉卷同意粉(114+127tl)，味道正正常常。食飽就落樓下超市行陣街。

之後再揸車去機場還車。

本身以為我哋撞咗車，還車可能要耐少少，點知完全冇，5分鐘內還完車可以走得。




今次搭Pegasus 18:30 Antalya去Istanbul SAW機場。*搭Pegasus只可以一件hand carry上機。*

Check in完一直等，等極都未boarding，結果又delay。今次delay一個鐘。












Havasbus 100tl

一出機場過馬路就係巴士站

上車買票。本身價錢唔係咁平，但應該找錢嘅時候就多咗俾我哋。今個旅程就發現土耳其人計數都幾差，成日都找錯錢。不過好彩我哋次次都係找多咗。







出到去市區都已經差唔多10點，所以諗住求其喺快餐店買啲嘢食算。最後買咗KFC 266tl




出到去發現獨立條大街都仲係超熱鬧超多人，夜晚有埋燈飾都幾靚。

今次揀咗住EA exclusive hotel, $492一晚。貪佢近機場巴士站。其實呢度附近嘅酒店都比較舊，我哋呢間算係幾新淨，而且價錢唔貴。裝潢都比較新穎時尚，房間大小適中，Wi-Fi順暢，水壓熱水都足夠，有升降機。非常滿意！

土耳其童話夢幻之旅 Day 8

土耳其童話夢幻之旅 Day 8 19/10/2023



酒店天台有無邊際海景泳池，吃早餐的地方也是望海景的。

早餐係土耳其式早餐，會上一大堆食物，擺到好靚咁。對住個一望無際嘅地中海食早餐，真係超級舒服。








附近有一個幾靚嘅沙灘，Kaş Belediyesi Halk Plajı, 去完沙灘可以返酒店沖涼，非常方便。揸車揸3分鐘就去到沙灘。不過沙灘椅同太陽傘要俾錢，加埋都應該$100，我哋只係Hea一陣，就唔租了。喺酒店曬咗條大毛巾過嚟瞓下，玩吓水影吓相，好快就返返酒店沖涼。

之後就去kas小鎮，行吓街影吓相。地中海feel嘅小鎮真係幾靚。朝頭早仲要唔太多人好舒服。

今年咁啱係土耳其建國100週年




因為啱啱食完個豐富早餐，唔太肚餓，就求其買個Waffle食下算。strawberry Waffle 100tl, 加醬加cream都要再加錢，所以我咩都冇加，haha 。




臨走去攞車嘅時候，就出咗意外啦。

架車我哋泊喺斜坡上面，開車嘅時候倒唔到車，直接向下衝，結果就撞咗前面嗰架車。對方道門凹咗，我哋嗰架就冇乜事。對方就報咗警，之後就等警察嚟。我哋問對方借咗電話打俾租車公司，警察嚟咗之後記錄晒所有嘢就可以離開。通常租車有任何意外，只要報咗警，就唔需要賠錢。好好彩我哋最後完全唔使賠錢，真係嚇鬼死。




之後就揸車去棉花堡啦，中途會經過一個網紅海灘。呢個海灘好靚好出名，叫Kaputas beach，聲稱係土耳其最美麗的海灘。啲粉藍色的海水好似倒咗顏料落去咁！真係冇見過呢隻色海水。因為今朝已經玩完水，所以我哋就冇落去玩啦，只係喺上面影吓相。










中途入油 1025tl




揸三個鐘頭車去到棉花堡，已經夜晚啦。唔知食咩好，求其喺Google Maps望吓附近有咩食，竟然見到一間亞洲菜叫Asian Kitchen & Coffee 中日媳婦私房菜 咖啡館。太耐冇食中式嘢，見又唔貴，就去試吓啦。

海鮮蛋炒麵 280tl($93)

糖醋雞 240tl($80)

唔知係咪太耐冇食呢，味道都真係幾好！價錢嚟講係土耳其就正常啦，但其實呢啲都係兩餸飯質素，如果係香港嚟講價錢就算貴㗎喇。

Total:635tl




酒店住Anya resort,棉花堡嘅酒店都非常便宜，大約$3-400就有一晚。同埋大部份都係民宿感覺的，始終係鄉村地方，不能要求太多。呢間正正常常商務旅館feel。房間都幾大，算係舒服。花灑水壓同溫度都還可以。

樓下有免費停車場，第二日揸車上棉花堡都只係5分鐘。