Magic for Witch: 福岡賞櫻之旅 Day 3

福岡賞櫻之旅 Day 3 30/3/2023

其實三年前已經想影櫻花PreWedding, 當時係諗住自己帶婚紗自己影的，不過因為疫情關係，所以就cancel了。

三年之後，終於可以去啦！不過見yen平，搵日本公司影都唔貴，所以就決定搵日本公司了！

日本婚攝公司，有啲係有香港代理的，嗰啲會通常貴啲，所以我主要係搵日本細公司影。細公司價錢唔貴，而且無咁多客，book期都易D。

其實要搵都好難㗎，因為通常佢哋要walk in傾，而且未必肯接外國人單。就算可以用email傾，佢哋分分鐘三至四日先覆到你一次，呢啲我就唔會搵。

我搵呢間叫wedding select, 係九州有幾間公司，話大唔大話細唔細。

https://www.wedding-select.wedding/

主要我哋用line用日文聯絡，通常1日內回覆。

問咗佢哋我日文麻麻哋，N3程度可唔可以，佢哋話無問題。

佢哋主要有studio plan同location plan，即係studio同外景。另外可以選和式or婚紗。

明碼實價，我揀咗和式外景，一個location 88000yen 連稅。落訂要比10000yen，信用卡過數。價錢包和服，新娘化妝set頭，150張相，包車。

因為知道櫻花期會比較多人book，所以我哋大概兩個月之前book。

Book完都一直擔心會落雨或者櫻花未開，最後好彩揀中櫻花滿開嘅日子，不過就有啲陰天，起碼冇落雨就算啦！

當日08:00去到店舖，一開始會叫你揀衫，我哋係官網上面已經睇定啲款，所以好快就揀完。

之後就開始化妝set頭，最後就着埋色打掛，大約都用咗兩小時。

10:30左右就搭專車去到舞鶴公園同攝影師會合。

之後就影相啦。攝影師同化妝師嘅英文程度都非常有限，我哋大多都係用日文溝通。如果唔識日文嘅話，最好搵多啲參考照片，等攝影師可以知道你想點。

化妝師係會全日跟住我哋嘅，佢係做晒化妝set頭着衫同助手，超級忙碌，哈哈！佢仲好好人，幫我哋拎袋，主動用我哋手機幫我哋影側拍！真係超級多謝佢！

大約12點左右影完。

雖然佢哋話要兩個星期先有相，但大約兩三日左右已經比到相我哋。可能陰天嘅關係，啲相嘅顏色有啲陰暗，我覺得佢哋啲相執得唔太好，所以就直接叫佢哋比原檔我自己執。

總括來講，呢間公司價錢唔貴，影出嚟嘅相，當然唔係超級靚嗰種，但咁嘅價錢我哋都已經非常滿意。而且工作人員都非常細心，抵讚！