Magic for Witch: 快閃福岡

快閃福岡 17-19/5/2016

其實福岡係我最無打算要去既日本城市，要去應該都去北海道先既！事緣有晚返night, 我同事同我講今晚12點hkexpress 又有平機票咼，去福岡來回連稅$420！本來都無咩興趣，仲同佢講平飛實一早俾有Ufly-pass既人搶曬啦！真係搶到就一齊去囉！結果竟然一㩒就㩒到，仲要load得好順，我地兩個都唔相信。但既然㩒到咁平，點都買啦！即時打俾同事調5月個night, 又係好成功調到！成件事順利到你唔信⋯咁就係半個鐘之內搞左個NOO快閃褔岡之旅出黎。

Night完訓左一個鐘就出發了，開始覺得自己就黎頂唔順呢d咁chur既旅行了。12:50準時起飛，仲比預期中早到。估唔到福岡機場入境超級快，落機唔洗半個鐘已經出到機場，好欣賞呀！係國際線要搭一程shuttle bus去國內線，around 15mins, 然後就可以搭地鐵空港缐去博多站，只係5分鐘。真係好少機場出市區可以咁快，我覺得褔岡真係好適合快閃shopping！

今日target 係博多站shopping, 呢度有兩個大商場，AMU plaza 同KITTE, 都係開到21:00。好肚餓去左mister donut買左個期間限定抹茶donut。

我地上左AMU plaza天台影下相先，本來有架kuro小火車可以坐，不過我地太遲來已經close左。但AMU plaza入面都有Kuro小火車可以影相。

我地主要行tokyu hands, 今次俾我發現左部print puzzle既機！400yen咋！

首先要上app store download佢個app:フオトミー,應該得日本app store先有，好彩我有日本app store account。Tokyu hands 有free wifi所以可以download個app。搞掂就要連上部機自己個wifi,好似係p字頭既。之後就可以用個app upload 相，upload完會有4個數字，只要入呢4個數字入puzzle機，佢就會開始print puzzle架啦！

質素都幾好架！

福岡好多商場都有free wifi, 抵讚！反而東京大阪講到週圍都有free wifi, 但好少真係connect到囉!

行到舖頭關門就去食晚餐，食燒肉多牛，由博多站行10分鐘左右，呢間係tabelog都幾高分,係top 5000！亦都出名排好耐隊，大部分都係遊客。我地21:20去到，都等左差不多50分鐘先入到。不過都真係值得等既，佢牛肉既質素好好，最貴既上雪花肉都只係680yen, 不過就只限每人叫一碟，真係物有所值架！

豬肉方面就只係普通質素。

total兩個人只係4460yen，好抵！

。。。。。。。。。。。。
焼肉多牛駅南店
地下鉄空港線博多駅徒歩約10分

17:30～23:00

。。。。。。。。。。。。

搭地鐵去天神站，行十分鐘左右就到candeo hotel褔岡天神。原價兩晚17820yen, 用左2900 jalan point, 只係 14920yen,換然之一晚只係$500左右，真係超抵！酒店感覺好新，房間頗有設計感。通常兩床房會比較貴，但這間沒有。

天台仲有半露天風呂！不過我地30幾個鐘無訓，所以訓醒第二朝先上去。朝早7:30上去得三四個人，都幾舒服。酒店缺點係wifi時快時慢，成日斷線。另外距離地鐵天神站10分鐘算係遠。

第二天

9:30就出發去outlet, 係酒店對面馬路loft門口已經有巴士站，可以坐303號巴士直去outlet, 460yen , around 30分鐘。係outlet個Starbucks 食早餐。

呢個outlet都多日本brand，不過唔算好平所以無咩買到野。

森林家族專門店的扭蛋, 300yen only!質素好好！

今次係Taito Station用2000yen夾到snoopy公仔～

係地下既information centre可以拎巴士discount ticket, 100yen既巴士減到50yen。搭巴士去姪浜站，呢個站行10分鐘左右有兩間大型超市和一間幾大既seria 100yen店，呢度好行過outlet好多，我地起碼行左兩個鐘，買左超多野！

Seria戰利品，買手工材料真係好抵！

要返酒店放低d戰利品先可以再出黎。返天神站果程就買左一日卷640yen, 搭三次已經抵。

行街之前我地去左酒店附近既たるま拉麵食lunch，呢間都幾出名架，福岡有三間分店。不過我個friend就覺得個湯好大陣豬味好臭，但我就唔覺。豬肉我地一致認為好好食！

炙りとろ肉チャーシュー麺1030円

。。。。。。。。。。。。
博多だるま
地下鉄七隈線天神南駅徒歩10分　
地下鉄七隈線渡辺通徒歩5分

11:30～24：30
。。。。。。。。。。。。

之後行天神地下街一帶，地下街d brand無興趣，但週圍d商場就幾好行。行左loft, core, vivre, Parco , 都未行完其他商場就已經開始關舖了，只好搭去博多站再行，呢邊d商場大多關21:00。

天神Parco disney store購入
左邊係手機袋，背面是透明的，可以唔洗拎部電話出黎就㩒到手機。2160yen
右邊Chip and Dale袋仔1620yen

行完街就去食串燒，呢間係博多站行10分鐘左右。串燒每串100～300yen, 都算係平，而且燒得幾好食。

。。。。。。。。。。。。

夢市門

福岡駅博多駅徒歩７分
17:00～23:00

。。。。。。。。。。。。

Day 3

由於要搭12:50既機，所以11:00就要岀發去機場。天神地下街有3間藥妝店都開09:00，當中大黑屋d野最平，我係果度掃左大量貨。

買完野返酒店check out,見時間不多，咁就去食個一蘭就走。食過咁多次一蘭做咩又食一蘭？天神呢間係唯一一間用方盒裝麵架！原本想食本店，不過本店無方盒，所以揀天神店食。味道就一樣既，唔特別介紹啦。