北海道跨年之旅 Day 2 1/1/2017
1月1號，搶福袋既日子！話說通常日本商場係1月1號都唔開既，1月2號先開門賣福袋。不過札幌站幾個商場Apia, Esta 同Stella place都係1月1號10:00開門。而大丸，Parco等就1月2號開，可以搶足2日福袋！
雖然今年先第一次搶福袋，但之前每年都有睇開福袋攻略，結論係其實福袋好伏，入面既野通常係賣唔出既貨。福袋5件入面可能有3件係伏。我呢種要睇啱先買既人係唔應該買福袋既，反正1月特價倒不如揀d自己鐘意既特價品買。但始終難得1月1日來到日本，都想試下買福袋既。
要減低中伏機會，攻略1.你要揀個價錢低既福袋。大部分衣服brand的福袋定價都在10000yen, 呢個定價其實好貴！你用成$700港幣買一堆自己未必鐘意既野，係好浪費既。所以今次我揀左Nice Claup 5400yen 既福袋。另外平價之選係majestic legon(6480yen), lattice (324yen 10件小飾品）
攻略2.揀有得睇內容物既福袋。近年福袋開始會show一兩件內容物出來俾人睇，通常是外套。你要assume外套以外既野都唔係你想要既野，若果你覺得呢件外套已經值福袋既價錢，咁你就買得過。就好似nice claup福袋咁，我認為灰色外套＋白色毛毛頸巾已經好值5000yen, 咁就買得過啦！
攻略3. 揀你著開既brand, 又或者一定鐘意既brand。今次我揀左sanrio既福袋，因為我覺得任何一款sanrio既角色我都會鐘意。今年福袋價錢是3000yen, 有5款指定公仔其中一款及必有毛巾一條。5款公仔我都鐘意所以呢個福袋必買！
平時睇電視d人係零晨就去排福袋既，但我相信北海道咁凍應該唔會有人半夜去排隊，所以我plan左早半小時，9:30去排隊就算。當日竟然個鬧鐘唔響，嚇死我！極速換完衫食埋早餐就去排隊，09:45先到。平時電視咪見d人係商場出面排隊既？但呢度並不是這樣的，因為係JR站既關係，商場一早已經開左，只係舖頭未開，所以d人係係心儀既舖頭門口排隊。
雖然話10點開門但9:45已經有部分舖頭開始開賣，我跑到nice claup門口，灰色福袋只剩3個！搶得到實在太lucky了！不過俾錢又要再排隊，但我要把握時間搶埋Sanrio 福袋，所以叫左豬仔幫我排隊俾錢，我自己去Sanrio 。
一去到sanrio仲未開，不過已經排長龍，起碼20人！一開門便被前排的人秒搶了！我完全搶不到！真係呆左好傷心！我真係好想買架！還好等了一回店員有少量補貨，我先搶到！lucky!
Nice Claup (5400yen)福袋介紹：
入面有5件衫，包括1.已知既灰色外套連白色頸巾，呢件真係幾靚，質素都好好，豬仔都話好靚好便宜！
2.淡藍色底衫一件，底衫都幾實用既，而且穿入面所以什麼款都無所謂。
3.白色長衣一件，呢件有點難襯，不過都還可接受。
4.灰色長褲連belt，呢件真係唔啱我，識我既人都知我極少著褲！所以呢件送左俾friend。
5.黑色V領冷衫，呢件都唔啱我，所以送左俾我呀媽。
總括來說這個福袋有一半係伏，但價錢平所以我都覺得值既！
Sanrio (3240yen)福袋介紹：
1. Little twins star公仔，呢隻係我最想要果款！所以超開心！
2. 大毛巾，條毛巾有Sanrio 既角色們既圖案係上面，都幾靚，好鐘意！我用黎做浴巾。
3. Hello kitty 樽2個，又係又靚又實用！good!
4. Hello kitty 頭型既夾仔4個，靚到唔捨得用，用左怕會俾人偷！
5. Sanrio x BR ice cream 筆4色一支，呢支都幾靚，返工可以用！
6. 肉桂狗x BR ice cream 袋，肉桂狗我都鐘意架！唔錯唔錯！
7. 多啦A夢x hello kitty毛巾＆memo 紙，毛巾我好少用，不過都幾靚！memo紙就好實用而且都好靚！
8. 唔知咩兔既袋3個，唯一我唔鐘意既野，其中一個大袋送左俾同事個女，另外2個細袋都可以自用。
總括來說這個sanrio福袋是超值的！可以話係無伏！所有野都好靚好有用，而且只係約 $200港幣！！！下次都一定會再買！
Lattice平時324yen一件飾物，福袋係324yen 10件飾物!!!!但太多人排隊豬仔唔俾我排...
呢d完全無人排既福袋就唔好買啦～
Loft既福袋大多是透明的，可以看到內容物，所以有好多無人要既福袋。
Earth Music and Ecology 福袋雖然網上已公開大部分福袋內容，但suggest唔好買，因為通常一月中佢會減至3折，到時買自己中意既衫仲好啦！
中伏率高的INGNI都好多人買。
買完袋就返返酒店放低啲嘢先，之後再出嚟食嘢，上左Esta 10/F既拉麵共和國食拉麵。呢度有好多間唔同嘅拉麵店，間間都排長龍。
我地揀左食白樺山莊，排我哋前面大約有四至五個人左右，大約排左10分鐘。因為我唔係太肚餓所以揀咗半份拉麵。
味噌拉麵半份 500yen
道產豚炙味噌拉麵1150yen
豚肉入口即化，蛋免費任食，呢間拉麵真係幾好食亦都幾抵食。
Total: 1700yen
。。。。。。。。。。。。
白樺山荘 札幌ら～めん共和国店
札幌ESTA 札幌らーめん共和国 10F
11:00～22:00
。。。。。。。。。。。。
食飽之後我哋就落地鐵買one day pass，係售票機買，平日要800yen, 週末及30/12-3/1只係500yen。我哋去北海道神宮，要搭去円生公園站。係さっぽろ站搭南北線喺大通公園站轉東西線，大約15分鐘左右就到。幾乎所有人都係落車去北海道神宮，所以只要跟着人群行就可以了！其實只係10分鐘距離，但因為太多人排隊，所以差唔多用左一個鐘頭先去到。1月1號係日本人嘅初詣，感覺上全札幌的人都來到這𥚃了！
參拜完之後我哋行去附近既円山原始林，豬仔話上網見到個山上面有松鼠，所以想行下，就係咁我就俾佢呃左去行山啦。我哋什麼裝備都沒有就走左去行雪山，其實都有啲危險架。
上山都只係小小滑，小心翼翼咁行大約45分鐘就上到山頂。沿途都有幾個日本人行上山所以都唔太驚。
山上面嘅風景都算係唔錯，最後我哋睇唔到松鼠，只係見到幾隻雀仔。落山先係一個挑戰，因為雪地真係勁滑，根本行唔到落山！有2/3既路程係瀡滑梯咁瀡落去，亦都PK左幾次，跌都pat pat好痛！好彩最後都安全落到山！
1月1日商場20:00關門，所以都係唔可以係商場食晚餐。
晚餐去左食串燒，餐廳叫串鳥，係札幌站北口行5分鐘左右。去到既時候有4-5個人排隊，大約等10分鐘就入得。有英文menu, 亦有圖片，點餐沒問題。
雞翼好好吃，但我們想再叫的時候已經sold out了！
串燒係一串一串計。每串都是1-200yen, 價錢合理，而且味道不錯！
另外還點了豚肉釜飯，好入味，而且份量多。
Total: 3100yen
。。。。。。。。。。。。
串鳥 札幌駅北口店
北海道札幌市北区北7条西4-8-3 北口ヨシヤビル 1Ｆ・2Ｆ
11:00～14:00
16:30〜00:30
定休日 12/31
。。。。。。。。。。。。
沒有留言:
張貼留言