北海道跨年之旅 Day 3

北海道跨年之旅 day 3      2/1/2017






話說發現左JR inn原來同舊市政廳好近，只係行5分鐘左右，所以我地就一早帶腳架過去影下合照。9點左右都有不少旅行團來這裡參觀，不過都唔算太多人。呢度影相真係幾靚！

我地影左一個鐘左右就返酒店放低腳架，準備出發去小樽。


札幌坐JR去小樽約半小時，單程1160yen。遊客可以買札幌-小樽Welcome Pass 1700yen, 包左札幌至小樽來回車票和札幌地下鐵一日券。單單是來回小樽已經抵，加埋札幌地下鐵一日券（800yen)就真係抵到爆！札幌地下鐵一日券可以不用在去小樽當日使用，我們在最後一天才用。

http://www2.jrhokkaido.co.jp/global/chinese/railpass/welcome.html

我地係札幌車站西口JR外籍旅客服務處購買pass。








這天還是假期所以都算多人，一上JR係無位既，不過過了幾站就有位了，車程不長很快到了。


一出站就行去小樽站旁邊的三角市場。呢個市場其實好細，單單是武田已佔了四分一。

其實我地想食帝王蟹，但兩個人無理由食一大隻，所以我地就問下可唔可以食半隻又或者隻幾隻蟹腳。結果店員以為我地想試食，切左蟹腳俾我地試，仲要超大方好大忽肉俾我地，我諗都已經值幾十蚊的了。真係超級新鮮好味！！最後佢終於明我地只係想買一兩隻蟹腳，但係唔可以咁買，失望！


無得食蟹只好食海鮮丼。


午餐時間當然係多人既，我地食大部分遊客都去既武田食，等大約十五分鐘先入得。

我叫左個三色丼（蝦，蟹，元貝)，豬仔就叫左ANA海鮮丼。呢個應該係我地食過最好食既海鮮丼，又甜又新鮮！不過就唔算平啦。

total 3800yen

。。。。。。。。。。。。

市場食堂 味処たけだ 

北海道小樽市稲穂3-10-16
夏　7：00～16：00
冬　8：00～15：00

。。。。。。。。。。。。








食飽就行去小樽運河hea下。其實預左小樽係冇咩做既，都係周圍行吓食吓野。

小樽運河真係冇乜特別亦唔浪漫，好彩都有d雪睇下。

喺度影下相就出發去第二個景點。之後去堺町，呢條路沿路有好多玻璃店，甜品店，燒烤店等等，行到最尾就係好出名嘅音樂盒博物館。呢度嘅燒烤店係可以自己揀海鮮來燒的，可惜我哋已經食咗海鮮丼，如果唔係一定會係呢度食燒蟹腳！




行咗一陣就見到六花亭，我喺呢度買咗好多包士多啤梨朱古力！呢度買同出面買嘅價錢係一樣嘅，但係呢度有一包包既裝賣，平過一盒買，亦都比較方便收藏。

二樓係食店，有泡芙同雪糕，如果買咗野就會送一杯咖啡。呢度既泡芙只係90yen一個，仲要送埋咖啡，真係超平！

咁平當然又唔會超級好食既，都係正常泡芙味啦！另外買左一包佢地好出名既提子餅，都ok 好食！最後豬仔都要encore多一次個泡芙。


之後就過隔離北菓樓，呢度可以試食架好正！不過我黎既目的唔係試食既，而係黎食佢好出名既泡芙，夢不思議。個名好似好吸引咁，其實食落好普通，都係beard papa既質素，不過大個d咁囉。可能我已經飽左所以唔覺好食啦。






之後影多陣相，就入去音樂盒博物館睇下。呢度有好多音樂盒，不過睇真啲其實都唔算好靚而且價錢唔平所以無買到。都係喺入邊影吓相就算，入邊嘅裝飾好有歐洲小屋風格，燈光又打得靚，影相唔錯。

睇完就慢慢行返去小樽運河睇夜景，呢度夜晚會打燈，所以比朝早靚。





最後搭返JR返札幌。今日嘅商場終於回復正常時間，店舖收21:00，食店收23:00。我地行左一陣街先上Stella place 6/F食晚餐。原本打算食根室花まる迴轉壽司，但呢間迴轉壽司係出名排長龍的，我哋九點去到，已經截龍了！！！


咁只好去食其他野，好彩都有back up plan。係同一層有十勝豚丼，去到都有幾個人排隊，排10分鐘左右先入得。呢間舖淨係得一款菜式—豚丼，可以揀既係豚丼既size, 我地兩個都叫左正常size。

估唔到豚丼真係好好食，豚肉好食，醬汁都好好味！太好吃所以正常size 跟本不夠呢！

Total：1684 yen

。。。。。。。。。。。。

十勝豚丼 いっぴん ステラプレイス店

札幌駅上 ステラプレイス 6F
11:00～23:00


。。。。。。。。。。。。